Gazte Sorkuntza Atariaren zozketaren zenbaki saritua

gazteonsorkuntzataria — Wed, 09 Dec 2009 12:24:38 +0000

Aurten beste behin ere Durangoko Azokan izan da Gazte Sorkuntza eta lehenik eta behin eskerrak eman nahi dizkizuegu zuen sorkuntzak eskuragarri jarri dizkiguzuen sortzaile guztioi.

Urtero zozketa ere burutzen dugu standa ordaindu ahal izateko eta aurtengo zenbaki saritua honakoa da: 854 . Zorionak beraz zenbaki hau duen boletoa erosi duenari eta Gazte Sorkuntza Atarian aurten salgai izan den material guztiaren ale banarekin otzara eder bat jasoko duzu.

Saria jaso ahal izateko bidali e-mail bat gaztesorkuntzataria@gmail.com helbidera zure izena, herria eta kontaktuarekin.

Mila esker edozein modutan lagundu gaituzuen guztioi eta zuei, erosleoi ere bai, noski.

GAZTE! ZURE SORKUNTZA DURANGOKO AZOKAN!

gazteonsorkuntzataria — Wed, 11 Nov 2009 13:01:40 +0000

Euskal gazteok urte luzez sorkuntzarako gaitasun itzela izan dugu. Herri guztietan gure behar sortzaileak asetzeko, kide, lagun eta ezagunekin elkartu eta sorkuntza proiektuak jartzen ditugu martxan. Halaber, bagara bidea bakarrik egiten dugunok. Baina beti ere, gure nahiak, munduko/gure herriko ikuspegian beste kolore bat jarri nahian, merkantilizaziorako helbururik gabe. Gure lana ekoiztu eta zabaltzeko nahia dugulako, besteekin elkarbanatu, gozatu, eztabaidatu, entzun edo ikusi.

Beste urte batez, gazteok autogestionatutako sorkuntzak leku bat izanen du guztiontzat ezaguna den Durangoko azokan. Gazteok sortutakoak zabaltzeko helburua du txoko honek. Editorial, diskoetxe eta feriante handien tartean euskal gazteok tarte bat egin nahi dugu; gu hemen gaudela aldarrikatu eta gure sorkuntzak pisu bat baduela plazaratzeko. Bestela, nola erakutsi Durangoko azokan gure kaleetan, entsegu lokaletan, gaztetxeetan… sortu eta garatzen dugun lana?

Beraz, txoko hau, gazte sorkuntza orori irekia geratzea nahi dugu. Proposamenik baduzue, bertan sorkuntzarik zabaldu nahi baduzue… hemen duzue bidea. Eta noski, esan gabe doa, ez dela diru truk izango, sorkuntzaren truk baino!

Abenduaren 1 baino lehen behean agertzen den emailera mezu bat bidaliz, lekua zuontzat da. Hori bai garrantzitsua da bertaratuko den sorkuntza zer den, nolakoa den, zenbat den eta nork (talde, norbanako, ez izen,…) egin duen zehaztea. Animatu eta erakutsi beraz zuen sorkuntza Gazte Sorkuntza Atarian!

gaztesorkuntzataria@gmail.com